Å, Guds martyrar sæle (LH592)

    Tekst: Anders Hovden 1913    Melodi: Ludvig M. Lindeman 1863

1Å Guds martyrar, sæle vitneskare / du Jesus Kristi fyrste hjartehjord, / som tok på kristendomen trufast vare / og sådde yver verdi livsens ord, / og krossen bar med tolugt mod / og vandra fram med Gud og ofra liv og blod.

2Som kjemper gjekk de fram i Kristi Ande / med hjarto brennande av heilag glod, / kvad takkesongar under fangebandet, / og trui sigra yver bål og blod, / og augo brast med sigerglans; / for syni høgt var vend mot livsens ærekrans.

3De Kristi kross hev midt i verdi planta, / det livsens tre med frukt til lækjedom, / der folki finn den føda som dei vanta, / og alle mødde røkt og hjarterom; / der finn den falne faderfamn, / vert atter reist på fot i Jesu Kristi namn.

4Å, hjelp oss, Jesus, at me og kan bera / din kross og vandra trutt i deira spor. / Lat krossen vera all vår elsk og æra, / nør sjeli vår med krossens dyre ord! / Då ber vårt liv i nåde frukt, / og gjennom dauden då me fær med dauden bukt.